Derbi i parë i javës së nëntëmbëdhjetë në Serie A është zhvilluar të shtunën mbrëma në San Siro ku janë ndeshur Milani dhe Fiorentina, në takimin i cili përfundoi me fitoren e skuadrës vendase me rezultat minimal 1-0.
Kaka ndërmjet dy kundërshtarëve, Foto: AP
Rossonerët e filluan takimin në mungesë të Ronaldinhos, pasi që Carlo Ancelotti preferoi ta inkuadronte atë nga stoli. Ndërsa te Viola mungoi njeriu kryesor, Adrian Mutu, por në ndeshje ishte ish-lojtari i Milanit Alberto Gilardino, i cili nuk arriti t’i hakmerret ish-skuadrës së tij.
Pjesa e parë e takimit i takoi përgjithësisht Milanit. Kuqezinjtë patën mundësi të shumta dhe ofruan spektakël në gjysmëlojën e parë, mirëpo arritën të shënojnë vetëm një gol pasi që nuk mundën t’i konkretizonin rastet e shumta.
Alexandre Pato ia solli fitoren Milanit, Foto: AP
Vendasit kaluan në epërsi që në fillim të ndeshjes (7’) kur Alexandre Pato pranoi një pasim të Jankulovskit dhe e mposhti portierin Storari.
E gjithë pjesa e parë u zhvillua me raste të Milanit, ndërsa superylli brazilian Kaka e dëshironte më së shumti golin, sepse ky mund të jetë takimi i fundit me fanellën e skuadrës së tij të zemrës.
Tifozët e Milanit janë kundër largimit të Kaka, Foto: Reuters
Nuk munguan edhe ovacionet e tifozëve, të cilët vazhdimisht këndonin: “Kemi ardhur që të shohim gol nga Kaka...”, mirëpo për fatin e keq të tyre dhe të vetë lojtarit, Kaka nuk shënoi këtë mbrëmje.
Në pjesën e dytë të ndeshjes, mysafirët u këndellën dhe në pjesën më të madhe të kohës e mbajtën në presion skuadrën kuqezi, megjithatë fati nuk ishte në anën e tyre, derisa Abbiati ishte më meritori që Milan nuk pranoi gol.
Alberto Gilardino (djathtas) nuk arriti të shënojë kundër ish-skuadrës së tij, Foto: AP
Me këtë fitore Milani është vetëm dy pikë parapa Juventusit që mban vendin e dytë dhe gashtë pikë pas liderit, Inter, që ruan pozitën e parë. Mirëpo dy skuadrat e kreut të tabelës nesër do t’i zhvillojnë ndeshjet e javës së nëntëmbëdhjetë.