Kriza e gazit, Europa drejt energjisë bërthamore

Askush nuk e di se çfarë i detyroi me të vërtetë liderët, që qëndrojnë pas Gazpromit të mbyllin rubinetat, por Europa duket se po shqyrton opsione të tjera për t’iu shmangur një krize të tillë.
Lufta e ftohtë për gaz vazhdon pavarësisht marrëveshjeve të nënshkurara mes Ukrainës dhe Rusisë, apo edhe premtimit se Moska, do të hapte rubinetat.
Por në bazë të një inspektimit të Bashkimit Europian nuk ka gjurmë të tij në gazsjellës. Gazprom fajëson Ukrainën, se po pengon furnizimin e Europës e lënë tashmë në mëshirë të këtij ngërçi energjitik.
Lajmet kontradiktore kanë lodhur Brukselin, që duket se nuk po merret seriozisht nga Rusia. Sërish , Moska i është kthyer shantazhit energjitik duke i vënë shkopinjtë ndër rrota demokracive pro perëndimore dhe trembur Bashkimin Europian, që merr një të tretat e furnizimit me gaz nga Rusia.
Analistë të huaj, thonë se ndonëse në postin e kryeministrit Vladimir Putini, po shfrytëzon Gazpromin në orkestrimin e një krize, që synon t’i shkaktojë indirekt kokëçarje edhe Shteteve të Bashkuara të Amerikës, të cilat bashkë me Çekinë dhe Rumanina kanë ndërmënd të ndërtojnë minireaktorë bërthamorë në rajon.
Kriza e gazit, që ka lënë në të ftohtë mijra europianë, ka bërë që liderët e kontinentit të brishtë nga ana energjitike, të marrin sërish në konsideratë energjinë bërthamore dhe rihapjen e centraleve që dikur konsideroheshin të pasigurt.
Bullgaria ka dy centralë, që më herët fajësoheshin për ndotjen e madhe të vendit, por këto centrale sidomos ai i Kozlodojit prodhonte mjaftueshëm energji jo vetëm për vendin por edhe për Ballkanin.
Sofja zyrtare ka ndërmënd t’i kërkojë leje Bashkimit Europian për rihapjen e këtyre centraleve. Franca merr 80 përqind të energjisë nga centralet bërthamorë. Rumania nga ana tjetër mendon se ka ardhur koha për pavarësi energjitike nga Moska, duke promovuar ndërtimin e gazsjellësit të Nabukos.
Askush nuk e di se çfarë i detyroi me të vërtetë liderët, që qëndrojnë pas Gazpromit të mbyllin rubinetat, por Europa duket se po shqyrton opsione të tjera për t’iu shmangur një krize të tillë.