Ministria e Ekonomisë dhe Financave njofton se është mbajtur takimi i parë i Komitetit Drejtues për projektin ,,Përmirësimi i administrimit të Tatimit në Pronë në Kosovë”, projekt ky i cili bashkëfinancohet nga SIDA dhe Ministria e Ekonomisë dhe Financave.
Në këtë takim është paraqitur raporti nga Departamenti i Tatimit ne Pronë lidhur me zhvillimin dhe aktivitetet e deritashme që kanë të bëjnë me projektin. Në veçanti është diskutuar sa i përket progresit dhe sfidave, komunikimi me tatimpaguesit dhe informimi i tyre, planifikimi për ri-anketimin e pronave si dhe çështjet strategjike të cilat kanë të bëjnë me këtë projekt.
Me këtë rast Zv/ministri i Ekonomisë dhe Financave, Bedri Hamza, drejtues i këtij komiteti gjatë takimit, ka çmuar arritjet në të hyrat nga tatimi në pronë gjatë vitit të shkuar, ndërkaq që ka inkurajuar të gjitha komunat e Kosovës që të rrisin ambiciet e tyre për realizim të hyrave vetanake.
“Viti 2008 ka qenë një vit i suksesshëm në realizimin e të hyrave vetanake të secilës komunë, dhe për këtë meritojnë të përgëzohen, mirëpo potencialet për realizim të hyrave janë edhe më të mëdha prandaj duhet të shfrytëzohen të gjitha mundësit ”, ka thënë Hamza.
Shuma e inkasuar nga tatimi në pronë gjatë vitit 2008, është 12.7 milion euro që është një rritje prej 53% apo 4.5 milion Euro krahasuar me vitin 2007. Nga shuma e përgjithshme prej 17.7 milion sa ishin faturuar për vitin 2008 janë inkasuar 12.7 milion Euro apo 81% e faturimit vjetor.
Thu Jan 15, 2009 11:32 am