Rritja ekonomike, edhe BERZH kundër Berishës

Pas FMN-së, Ministrisë së Financave, BSH-së etj., edhe BERZH së fundmi ka dalë në një deklaratë për shtyp, ku thuhet se rritja ekonomike në 2008-ën do të pësojë ulje, duke regjistruar nivelin e 6%.

Në këtë pikë, Kryeministri Berisha është i vetmi që beson në një rritje ekonomike të Shqipërisë me rreth 10 për qind. Raporti i Tranzicionit 2008 i BERZH-it, i cili gjurmon performancën ekonomike dhe progresin e reformave në vendet ku vepron BERZH, parashikoi se rritja e përgjithshme ekonomike do të ulet në 6.3% në vitin 2008, nga 7.5% në vitin 2007 dhe do të bjerë nën 2% në vitin 2009. Konkretisht, sa i takon vendit tonë, BERZH-i deklaron se, rritja ekonomike në Shqipëri pritet të arrijë 6.1% në vitin 2008, nga 6% në vitin 2007. Ndërsa në vitin 2009, rritja pritet të arrijë në 4%. Ivo Germann, ekonomisti kryesor i BERZH-it për Shqipërinë, u shpreh se "Shqipëria po vazhdon të ketë një progres të mirë në disa fusha, por nevojiten më shumë përpjekje për të përmirësuar mjedisin e biznesit dhe rritjen e cilësisë së infrastrukturës për të ruajtur në të ardhmen rritjen mbresëlënëse ekonomike të viteve të fundit".