Bashkimi i Sindikatave të Pavarura të Kosovës (BSPK) me anë të një njoftimi zyrtar ka reaguar ashpër ndaj deklaratave të Partisë Social-Demokrate të Kosovës, ku zëdhënësi i kësaj partie Gëzim Kasapolli në një konferencë për shtyp ka deklaruar se Qeveria ka arritur t'i përçajë sindikatat në vend, edhe ashtu të politizuara, në mënyrë që të ketë kontroll mbi to.
Në njoftim thuhet se, BSPK-ja ua bënë me dije edhe PSD-së, por edhe të gjitha partive tjera se është subjekt i pavarur dhe jo i politizuar dhe se askush mbi të nuk mund të ketë kontroll.
“Është e vërtetë që qeveria ka arritur të krijojë "sindikata" me disa individ, me qëllim të realizimit të interesave të saja ose që të tentoj ta ulë zërin e BSPK-së, mirëpo BSPK-ja nuk i nënshtrohet qeverisë dhe asnjë subjekti politik dhe do ta vazhdojë rrugën e saj për mbrojtjen e interesave të punëtorëve dhe do të jetë zëdhënës i tyre”.
Në po të njëjtin njoftim thuhet se, e drejta për punë është e garantuar me Konventat Ndërkombëtare ndaj BSPK-ja konsideron se pa u rregulluar kjo çështje me infrastrukturë ligjore nuk ka stabilitet politik e as ekonomik.
“Ua bëjmë me dije opinionit të gjerë publik se BSPK-ja ka qenë prijëse e shumë proceseve politike madje edhe para partive politike”.
BSPK-ja po ashtu ka njoftuar se ua ka dërguar kërkesat e punëtorëve të gjitha qeverive, madje edhe partive politike para zgjedhjeve, por deri më tani asnjë qeveri e as parti nuk na ka kthyer përgjigje.
“BSPK-ja e njofton opinionin e gjerë publik dhe anëtarësinë e saj se do vazhdojë rrugën e saj për mbrojtjen e të drejtave të punëtorëve dhe se nuk do t'i nënshtrohet askujt”.