Finlandezi: Mezi pres…
Sezoni i tretë i Kimi Raikonenit te Ferrari niset nga një objektiv i
vetëm. “Duam t’i fitojmë të dy kampionatet! Eshtë bukur të kthehem te
makina. E pres me ankth garën e parë dhe të nis sezonin në Melburn,” -
ka thënë finlandezi.
Ndërsa për makinën ai u shpreh: “Duket ndryshe, për shkak të
rregullave të reja, por, pasi e provon pak, mësohesh me formën e re.
Eshtë ndryshe, por shumë e bukur. Dua ta provoj në pistë se si ecën”.
Ish kampioni i botës duhet ta harrojë sezonin 2008, por nuk e lë
veten të merret nga optimizmi, në lidhje me sezonin 2009. “Viti që
shkoi nuk ishte ai që prisja, por i takon së kaluarës. Këtë vit do të
provojmë të fitojmë, por nuk dihet se si do të jetë sezoni i ri dhe
kush ka bërë makinë më të mirë.”
Provat e para të Ferrarit u kanë dhënë pilotëve një ide për aftësitë
e kësaj makine. “Rregullat kanë ndryshuar, por mendoj se do të jenë
konkurruese. Kemi besim se kemi bërë një makinë të mirë. Në testet e
javëve të ardhshme do të shohim se si do të jetë makina, në raport me
rivalët, dhe nga aty do të mund të themi diçka,” - ka thënë Raikonen.