Kapiteni i Barcelonës shmang euforinë: Gjithçka vendoset në maj
Barcelona “po fluturon” në të gjitha veprimtaritë ku po merr pjesë dhe në “Kamp Nou” kanë filluar të ëndërrojnë për një sukses të trefishtë, që nuk ka ndodhur asnjëherë në historinë 108-vjeçare të klubit katalanas.
Barça kryeson kampionatin spanjoll me 12 pikë avantazh, do të luajë në 1/8-t e Ligës së Kampioneve dhe ka arritur në çerekfinalen e Kupës së Mbretit. Kapiteni Karles Pujol ndihet i lumtur nga momenti që po kalon skuadra, por i fton shokët e skuadrës të qëndrojnë të përqendruar deri në muaj maj, atëherë kur shpërndahen trofetë.
I gjithë ambienti që na rrethon është në delir; ky është një avantazh i jashtëzakonshëm, nëse ne vazhdojmë të jemi të përqendruar. Me Guardiolën kemi nisur një cikël të ri që na bën të gjithëve shumë entuziastë.
Duhet të vazhdojmë në këtë rrugë, sepse kemi gjetur sekretin, por nuk ka vend për festë. Rëndësi kanë vetëm trofetë, ato mbahem mend. Gjithçka vendoset në maj dhe atëherë duhet të festojmë. Njerëzit po thonë fjalë të shkëlqyera, por duhet të qëndrojmë me këmbë në tokë.
Ndeshja ndaj Osasunës ishte shembulli më i mirë se ç’mund të ndodhë, në rast se bie përqendrimi. Osasuna shënoi dy herë në portën tonë, sepse e menduam ndeshjen të fituar para kohe, por kjo mund të na kushtonte shtrenjtë.
Fatmirësisht, e gjetëm forcën për të reaguar dhe për këtë na ndihmuan kampionët e mëdhenj që kemi në skuadër. Sezoni është i gjatë dhe është më e vështirë ta ruash majën sesa ta arrish atë.”
Roben: Leo i përket një tjetër planeti
Arjen Roben, mesfushori i Realit të Madridit, deklaroi dje se Lionel Mesi është futbollisti më i mirë në botë, pavarësisht se ka ende shumë për t’u përmirësuar. Për të përditshmen “AS”, ai tha: “Ai është futbollisti më i mirë në botë.
Mesi është në formë të shkëlqyer. Sipas meje, i përket një tjetër planeti. Eshtë më i mirë, ndryshe nga të gjithë ne. Askush nuk mund të krahasohet me atë”.