Maradona: Me Moratin do të isha i Interit!

Legjenda argjentinase, ka qenë në Milano, ku është takuar në klubin e Interit me trajnerin Mourinjo

Eshtë një nga historitë më të mëdha të dashurisë që janë përjetuar ndonjëherë në botën e futbollit, ajo midis Diego Armando Maradonës dhe Napolit, por që mund të mos kishte lindur kurrë. Ka qenë vetë legjenda e futbollit botëror që e ka zbuluar një gjë të tillë, me rastin e vizitës në qendrën stërvitore të Interit.

Skuadrës, të cilës do t’i kishte thënë po Diego, vetëm nëse Masimo Morati do të kishte përshpejtuar hyrjen e tij në botën e futbollit me dhjetë vite. “Me gjithë respektin që kam për tifozët napoletanë, - ka deklaruar Diego, - që janë dhe do të mbeten gjithmonë në zemrën time, besoj se, nëse Morati do të kishte qenë president në atë kohë, unë do të isha bërë lojtar i Interit.

Në Itali është padyshim presidenti që pëlqej më shumë. Eshtë një person i shkëlqyer.” Verën e kaluar, sipas Maradonës, e ka vënë klubin e tij në duar të mira. “Ka marrë Mourinjon, trajnerin që unë do të kisha marrë, padyshim, nëse do të kisha qenë president i ndonjë klubi.

Ka qenë blerja më e mirë e mundshme, ia kam thënë këtë edhe Moratit, kur kam pasur rastin. Hoze ka gjithçka: di të flasë me lojtarët, me shtypin. Për mua është më i miri.” Ku i dihet, nëse si lojtar, duke parë karakterin që ka portugezi, do të kishte shkuar mirë me të…

Më pas diskutimi kalon te talenti i padiskutueshëm argjentinas, Lionel Mesi, që nga shumë cilësohet si Maradona i ri: “Ndoshta është ai, - pranon me modesti Maradona. - Do të doja që Leo të ishte akoma më i fortë se unë, do të fitonim të gjithë.

Futbolli argjentinas, kombëtarja dhe unë në cilësinë e trajnerit të kombëtares. Për këtë do të më pëlqente jo që Mesi të bëhej Maradona i ri, por që të ishte akoma edhe më i mirë se Maradona”.