Zyrtarët brazilianë njoftuan se vdiq supermodelja braziliane, Mariana Bridi, së cilës i ishin prerë duart dhe këmbët për shkak të një infeksioni.
20 vjeçarja Bridi, vdiq nga komplikacionet e një infeksioni rezistent ndaj ilaçeve, njoftuan zyrtarët brazilianë të shëndetësisë.
Bridi ishte shtruar në një spital të qytetit Serra në shtetin Espirito Santo që nga data 3 janar.
Mjekët fillimisht e diagnostikuan atë me gur në veshka në muajin dhjetor por me keqësimin e gjendjes, ajo pësoi infeksion të traktit urinar, i cili pastaj u përhap në të gjithë trupin. Arsyeja e infeksionit mbetet e panjohur.
Bridi ka qenë dy herë finaliste e konkursit Miss Bota në skenën braziliane. Ajo e filloi aktivitetin si modele që në fillimet e adoleshencës së saj dhe në vitin 2007 përfaqësoi Brazilin në garën Miss Bikini International në Kinë.