Leja e ndërtimit, jo më shumë se 45 ditë

Projektligji për planifikimin e territorit

Në mbledhjen e Këshillit të Ministrave, Kryeministri
Berisha informoi se projektligji për planifikimin e
territorit është produkt i një diskutimi të gjerë me të
gjitha grupet e interesit.

Sipas tij, "projektligji vendos në një
bazë të re tërësisht ligjore procesin e planifikimit dhe administrimit
të territorit dhe i jep një organizim të ri trajtimit të
këtij problemi, duke sjellë zgjidhje bashkëkohore për të gjitha
pengesat burokratike që me vonesat dhe mospërcaktimet
kanë nxitur ilegalitetin dhe ndërtimet ilegale". Shefi i qeverisë
pohoi se "ligji do të përfshijë amendimet që ne dërguam
në parlament, ku leja e ndërtimit nuk mund të jetë mbi 45
ditë vonesë dhe parimin ‘heshtja është miratim‘". "Por ligji
ka nevojë të specifikojë edhe llojet e lejeve, sepse nuk mund
të kemi të njëjtin tagër për lejen e ndërtimit të një pallati,
lejen e ndërtimit të një resorti turistik, apo një parku industrial",
tha Kryeministri Berisha. Megjithatë, ai sqaroi se "këto
specifikime nuk bëhen për të zgjatur burokracinë, por për të
përcaktuar më mirë linjat që do të ndiqen".