Filmi i Pitt udhëheq nominimet për Oskarë

Filmi i Brad Pitt, "The Curious Case Of Benjamin Button" dhe filmi "Frost/Nixon" udhëheqin nominimet nga Academy Awards 2009.

Pitt është nominuar në kategorinë e aktorit më të mirë, ku do të konkurrojë përballë Frank Langella (“Frost/Nixon”), Sean Penn (“Milk”), Mickey Rourke (“The Wrestler”) dhe Richard Jenkins (“The Visitor”).

“The Curious Case Of Benjamin Button” është i nominuar edhe në kategorinë për filmin më të mirë së bashku me “Slumdog Millionaire”, “The Reader”, “Frost/Nixon” dhe “Milk”.

Partnerja e Brad Pitt, Angelina Jolie, është e nominuar për çmimin e aktores më të mirë për rolin e saj në filmin “Changeling”, ndërsa konkurrente do t’i ketë: Kate Winslet (“The Reader”), Anne Hathaway (“Rachel Getting Married”), Meryl Streep (“Doubt”), Melissa Leo (“Frozen River”).

Aktori i ndjerë Heath Ledger do të konkurrojë në rolin më të mirë dytësor për rolin e Jokerit në filmin “The Dark Knight” përballë Josh Brolin (“Milk”), Robert Downey Jr. (“Tropic Thunder”), Philip Seymour Hoffman (“Doubt”) dhe Michael Shannon (“Revolutionary Road”).

Nominimet janë bërë publike në një konferencë për shtyp të enjten në Los Angeles nga aktori më i mirë i vitit 2007, Forest Whitaker. Ndarja e çmimeve Oskar do të mbahet më 22 shkurt në Los Angeles.